তুই বিঝু

ফাগুনোর বোয়েরো লগে তুইও

দেখা দোচ্চি বিঝু;আমার সমাজ ওট

ঝুরোঝুরো মিদেমিদে বোয়েরত

তুই মিজি জাদ আমা লগে।

শিমেই ফুল আর কৃষ্ণছড়া ফুলোর বাজে

সাজি উদে গোদা আদামান।

ভালক বাবত্তে ফুল লোয় সাজি যায়

আমা আদামান!

বারি সিৎ বিজে মর, বিঝু তুই এলে।

আদামর থুম সঙ সাজি উদে

ফুলেফুলে, পোগো গীদে

নাজি উদে মানজোর দোল মন।

রিবেক ফুলোর তুমবাজে আওলপাওল

অয় মন;কোকিলোর মিদে সুর

শুনিলে মন উদে বিঝু তরে।

হাত্তল পোগোক পেগেয়েও জানে

দে আমারে বিঝু তুই এলে।

নুও নুও স্ববন বুনোঙ বিঝু তুই এলে।

আয় বিঝু আমা ইদু।

৬/৪/২১

সুদিপ্তা দেওয়ান পাড়া

দোচ্চি-দোত্তি(হুরোহুত্তে উন হন)

ধনপদি হক্কে এবে

তর আজায় এব আগঙ

ধনপদি মুই।

হমলে এবে মহ্ হায়

তর আজায় বাজি তেম

গোদা জীংহানি মুই।

তরে দিগিলে মনান গম লাগে

হোচপানা জাগে।

মনান মর হাজিহুজি তায়

তরে দিগিলে।

তরে বানা হায় তোগায়

হায় চায় মর মনানে।

তোর দোল দি চোখ

মর মনানরে বাজি তিবার

বল দিদে।

তর দোল আজি,

মর মনানরে গরে

ওলোজোলো!

হায় তোগায় বারে বারে তরে

ও ধনপদি আয় মহ্ বুগোত।

দিজনে মিলেনেই বাজি তেবঙ

হাজার ধুরি এই সংসারত।

১/৪/২১

টিএ্যান্ডটি

বানা তরে নিনেই

মনান মর ওলোজলো অয়

তরে মনত উদিলে।

বানা তরে নিনেই তায়

মর দোল মনান।

তরে হোচপায়, তরে গমপায়

মর মনর স্ববনান।

বানা তরে নিনেই স্ববন বুনে

মর মনানে।

তরে ছাড়া হাক্কোনও তেই নহ্

পারে মর পরানান।

দিনেরেদে তরে ভাবি,

চোগত নহ্ অই ঘুম

মুওত নহ্ রুজে ভাদ-পানি

কিয়ে ঘান জায় ভাঙি্।

তো তরে হোচপেনেই

ঘনঘন ভাবে মর মনান।

স্ববন দেগে এব তরে নিনে

হোচপেয়েই মর মনানে।

আয় ফিরি তুই

বানা তরে নিনেই স্ববন বুনিম মুই।

২৯/৩/২১

কল্যাণপুর